Домашните миленици сакаат да поминуваат време покрај своите сопственици, а во зимскиот период неретко се качуваат на креветите во домот за да се стоплат покрај некоја мека прекривка. Но, што ако креветот е покриен со волнена прекривка или дебело ќебе? Дали нивната тежина е безбедна за нашите кучиња и мачки?

Пред да го пуштите вашиот миленик под топлиот јорган, ова се работите што треба да ги знаете во врска со покривањето на вашето куче или мачка, пишува „Телеграф“.

Дали е безбедно милениците да спијат под тежок јорган?

Постојат прекривки кои тежат од 5 до 10 килограми. Таквите ќебиња или јоргани се соодветни за возрасен човек од најмалку 50 килограми, но ако едно животно се покрие со нив – ќе му биде тешко да се извлече.

Дали имате мало куче од неколку килограми, како што се оние од расата чивава? Нема шанси овие миленици да излезат од под тешкото ќебе и ако не сте во нивна близина – може да останат заробени. Покрај тоа, тежок јорган може да направи силен притисок врз градите на вашето домашно милениче и да предизвика паника поради проблеми со дишењето. Ако кучето или мачката имаат астма или проблеми со дишењето, оваа тежина на ќебето ќе биде опасна за нив. Мачките и кучињата кои имаат рамно лице и скратен нос, како што се бурманските, хималајските и персиските мачки, како и англиските и француските булдози, бостонските териери и боксерите се особено изложени на ризик.

Вашето милениче ќе биде изложено на уште поголема опасност ако ќебињата имаат украси во форма на реси или мониста – милениците можат да го проголтаат. Некои производители на ќебиња прават полнети ќебиња специјално за домашни миленици. Тие се лесни и дизајнирани за средни и големи раси на кучиња.

Лесното ќебе од вештачко крзно е најдобрата опција за покривање на вашиот домашен миленик.

Со што да го покриете вознемирениот миленик?

Многу кучиња и мачки стануваат вознемирени кога нивните сопственици ја напуштаат куќата, ако слушнат звуци како огномет или доживеат грмотевици.

Наместо да му земете ќебе на вашиот миленик, подобра опција е да му купите елек или топла јакна, како и меки играчки со кои ќе си играте додека сте отсутни. Кога ќе се вратите дома, дајте му на вашето куче или мачка што е можно повеќе време, внимание и љубов.