Американскиот Стејт департмент денеска објави визни ограничувања за 28 кубански службеници кои се осомничени за вмешаност во, како што вели, задушувањето на „мирните протести во Куба пред речиси една година“.

Во соопштението на Стејт департментот, ограничувањата се однесуваат на високи членови на Комунистичката партија на Куба и функционери кои работат во комуникациските и медиумските домени на државата, пренесува Ројтерс.

Кубанскиот министер за надворешни работи Бруно Родригез набргу на социјалните мрежи ги осуди американските мерки и политиката кон Куба, оценувајќи дека тие го прекршуваат меѓународното право.

„Со оглед на неуспешниот обид да се предизвика бунт во Куба во 2021 година, американската влада и нејзиниот државен секретар се обидуваат да ја дискредитираат победата на народот над империјалистичката агресија“, рече Родригез.

Куба соопшти дека економското ембарго на САД од времето на Студената војна, во комбинација со наводните напори за поттикнување протести на островот, има за цел да ја собори владата на Куба, управувана од Комунистичката партија.