Најдобрата светска тенисерка Арина Сабаленка се пласираше во осминафиналето на ВТА турнирот во Вухан, Кина, откако денеска во второто коло ја победи Словакинката Ребека Шрамкова со 4-6, 6-3, 6-1 во меч кој траеше еден час и 58 минути.

Сабаленка во осминафиналето ќе игра против Русинката Људмила Самсонова, која ја победи Американката Софија Кенин со 3-6, 6-3, 6-1.

Клара Таусон од Данска исто така се пласираше во осминафиналето, победувајќи ја Хрватката Антонија Ружиќ со 6-4, 6-0.

Таусон ќе се соочи со победничката од дуелот помеѓу Италијанката Јасмин Паолини и Јуе Јуан од Кина во осминафиналната фаза на турнирот.

Порано Американките Џесика Пегула, Ива Јовиќ и Коко Гоф, како и Екатерина Александрова, Шуаи Жанг од Кина, Катерина Синијакова од Чешка, Магдалена Фрех од Полска и Швајцарката Белинда Бенчиќ се промовираа како осминафиналистки.

Турнирот во Вухан се игра за награден фонд од 3.654.963 долари.