Руската војска извршила „злосторства против човештвото и воени злосторства“ за време на нападите со беспилотни летала врз цивили во украинскиот регион Херсон, според извештај објавен денеска од експерти на Обединетите нации (ОН).

Извештајот  на Независната меѓународна комисија на ОН за истрага на Украина се фокусира на регионот Херсон, на југот од земјата, каде што „овие дела се извршени со примарна цел – да сее терор меѓу цивилното население, што е кршење на меѓународното хуманитарно право“.

Иако овие експерти назначени од ОН не зборуваат во име на организацијата, ваквите категорични обвинувања за злосторства се ретки, во отсуство на одлука на национален или меѓународен суд.

„Нападите продолжуваат и во моментот на објавување на овој извештај“, велат експертите.

Комисијата ги истражуваше нападите врз Херсон и 16 други локации преку геолоцирање на видео снимки и консултирање со достапни извори.

Русите користеле цивилни дронови, достапни во големи количини, со пренасочување на нивната функција, вооружувајќи ги со бомби што можат да се фрлаат, а исто така и со дронови што експлодираат при удар, се додава во извештајот.