Рускиот весник „Новаја газета“, чиј уредник е Дмитриј Муратов, еден од минатогодишните добитници на Нобеловата награда за мир, соопшти вчера дека ги запира своите онлајн и печатени изданија до завршување на руската „специјална воена операција“ во Украина.

Рускиот весник во соопштението наведува дека добил уште едно предупредување од надзорниот орган за масовни медиуми и телекомуникации Роскомнадзор за своето известување, што го наведе да ја паузира својата работа, пренесува Ројтерс.

Весникот Новаја Газета“ веќе отстрануваше материјали од својата веб страница за руската воена операција во Украина за да се усклади со новиот закон за медиуми.

Муратов неодамна соопшти дека ќе го донира медалот од Нобеловата награда за мир, за да биде продадена на аукција за собирање на средства за помош на украинските бегалци.