Неодамна од печат излезе романот „Зошто сум ве лажела?“ на познатата хрватска писателка Јулијана Матановиќ. Таа е универзитетска професорка и е една од најугледните книжевници во Хрватска. Зад себе има огромен опус на прозни дела што доживуваат голем број изданија.

„Зошто сум ве лажела?“ е еден од нејзините најмаркантни романи каде што се зборува за младешките авантури на една многу специфична девојка. Романот во Хрватска доживеал околу петнаесет изданија. Ова е прво дело од оваа голема хрватска прозаистка преведено на македонски јазик.

За своето дело Јулијана Матановиќ пишува: „Младешките дневнички белешки, чувани во моето сеќавање, се понудија како градиво за четиво во кое, спротивно на вообичаените правила, само имињата би биле стварни. Комбинирани со по некој проверлив настан и поттикнати од чувствата во чии опишувања немало измама, создадоа текстови, кои барем по судењата на читателите, би можеле да бидат запишани и во многубројни дневнички нафрлувања од некои други. Шаренилото на мотивите, меѓу кои преовладуваат оние впишани на страниците во дамнешниот младешки обид, а уништени поради сопствената невнимателност денес, во форма на расказ ме потсетуваат на мојот гимназиски дневник во кој беше многу поважно да се забележи доживувањето на нештото, отколку точното време во кое се повлекол потегот.“

Романот е во превод на Сашо Огненовски и во издание на „Перун Артис“ од Битола.

(Текстот е објавен во „Културен печат“ број 274, во печатеното издание на весникот „Слободен печат“ на 29-31.3.2025)