Во Градската библиотека „Браќа Миладиновци“ – Скопје на 5 март, во 19 часот, ќе се одржи разговор со писателката и преведувачка Калина Малеска. Романот „Светот што го избрав“ на Малеска е книга за месец март во сите библиотеки од мрежата на ГБСК и дел од големата кампања „Читаме современи македонски автори“.

Модератор на разговорот е Александра Јуруковска, а фрагменти од делото ќе чита актерот Андреј Серафимовски.

– Романот на Калина Малеска ја сугерира женската визура во гледањето на светот и ја актуализира еманципацијата на женското авторство во современата македонска проза… „Светот што го избрав“ се гради како еден хронотоп на куќата и тоа замислена како вертикално битие обезбедено со поларитетот на визбата т.е. подрумот, која соодветствува на несвесното, и таванот, кој одговара на духовното воздигнување – напиша рецензентката Весна Мојсова Чепишевска.

Калина Малеска е авторка на збирките раскази „Недоразбирања“ („Македонска книга“, 1998), „Именување на инсектот“ („Слово“, 2008), „Мојот непријател Итар Пејо“ („Или-или“, 2016) и „Скопје во високата зона“ („Или-или“, 2021); романите „Бруно и боите“ („Слово“, 2006) и „Призраци со срмени нишки“ („Слово“, 2014); драмата „Случка меѓу настани: Хипатија од Александрија“ („Слово“, 2010); книгите за деца „Арно ама“ („Или-или“, 2018) и „Вонземјанинот Лу-Ру-Су“ („Или-или“, 2021); книжевните студии „Облици на моќ во современата книжевност“ („Или-или“, 2020) и „Визија, трансформација: Утопии, дистопии и други замислени светови“ (Филолошки факултет „Блаже Конески“, 2023); како и уредник и коавтор на студијата „Кон-текстот: дигитални осврти“ (самостојно издание, 2023).

Малеска е професорка по англиска книжевност на Филолошкиот факултет „Блаже Конески“ при УКИМ во Скопје, а нејзини статии поврзани за книжевни истражувања се објавени во домашни и меѓународни списанија, a се занимава и со книжевен превод.