Саудискиот престолонаследник Мохамед бин Салман и шефот на рускиот државен инвестициски фонд (РДИФ) Кирил Дмитриев биле вклучени во преговорите за ослободување на американскиот наставник Марк Фогел од руски затвор, изјави за „Ројтерс“ извор близок до преговорите меѓу САД и Русија, под услов да остане анонимен.

Фогел, наставник во американско училиште во Москва кој беше осуден на 14 години затвор во Русија за поседување марихуана, беше ослободен вчера.

Кремљ и Саудиска Арабија засега не ја коментираат веста.

Саудискиот принц, познат и како МбС, помогна и во преговорите за најважната американско-руска размена на затвореници од Студената војна во август 2024 година. Тој договор, кој се работел во тајност повеќе од една година, вклучуваше 24 затвореници – 16 беа испратени од Русија во западни земји, меѓу нив и САД, а осуммина беа вратени во Русија од Западот.

Пратеникот на претседателот Доналд Трамп за Блискиот Исток, Стив Виткоф, во вторникот го врати Фогел од Москва во Соединетите Држави, откако ненајавено застана во Русија.

„Њујорк тајмс“ денеска објави дека во размената за Фогел, САД ќе го испрати во Русија крипто-измамникот Александар Виник, кому во САД му се закануваа 20 години затвор за перење пари.

Значајната улога на Саудиска Арабија, која одржува одлични односи и со Москва и со Вашингтон, како медијатор меѓу Русија и САД, денеска ја потврди и американскиот претседател Доналд Трамп, кој рече дека неговата средба со рускиот лидер Владимир Путин, на која ќе разговараат за ставање крај на војната во Украина, ќе се одржи токму во Саудиска Арабија.

Трамп очекува тој и Путин да се сретнат кај заедничките пријатели – во Саудиска Арабија