Рогозин: Вселенската соработка ќе биде можна кога ќе се укинат санкциите против Москва
Шефот на руската вселенска агенција Дмитриј Рогозин денеска изјави дека обновувањето на нормалните односи меѓу партнерите на Меѓународната вселенска станица (МВС) и другите заеднички вселенски проекти ќе биде можно кога Западот ќе ги укине санкциите кон Москва.
„Целта на санкциите е да се убие руската економија и да се турне нашиот народ во очај и глад, да се фрли нашата земја на колена. Нема да успеат во ова, но намерите се јасни”, рече Рогозин.
Шефот на Роскосмос на социјалните мрежи објави дека враќањето на нормалните односи меѓу партнерите на Меѓународната вселенска станица и другите проекти е можно „само со целосно и безусловно укинување на незаконските санкции”.
Рогозин додаде дека предлозите на Роскосмос за прекин на соработката на МВС со вселенските агенции на САД, Канада, Европската унија и Јапонија наскоро ќе бидат доставени до руските власти.
Тој претходно изјави дека санкциите можат да го „уништат” американско-руското партнерство на МВС.