Министерот за спорт, Борко Ристовски објави дека по долги години поделби, конечно може со гордост да се каже дека македонското пливање се обедини во интерес на спортот.

Ристовски упати честитки до Сашо Лазаровски, новиот претседател на Националната пливачка федерација, кој на денешното изборно Собрание доби поддршка од сите клубови.

Воедно министерот за спорт информира дека сметката на федерацијата ќе биде одблокирана во најбрз можен рок:

– Ги поздравувам сите што ја прифатија мојата иницијатива за обединување. Министерството за спорт ќе посредува и ќе помогне во решавањето на проблемите што со години го обременуваа овој спорт. По овој обединувачки момент, во најбрз можен рок ќе биде одблокирана сметката на федерацијата.

Не смееме да дозволиме поделбите да одат на штета на пливачите и на децата што со љубов го одбираат овој спорт. Обединети за подобри резултати и посилен спорт – стои во објавата на Ристовски на Фејсбук.