Парализиран човек може повторно да застане сам откако примил само една инјекција на нервни матични клетки за лекување на повреда на ‘рбетниот мозок. Неименуваниот Јапонец беше еден од четворицата луѓе кои учествуваа во првото од ваков вид клиничко испитување, каде што се користат репрограмирани матични клетки за лекување на парализирани луѓе.

Друг маж можел да ги движи нозете и рацете по третманот, но двајца учесници во студијата не покажале подобрување, пишува „Нејчр“.

Клиничкото испитување беше спроведено од Хидејуки Окано, научник од Универзитетот Кеио во Токио. Резултатите сè уште не се рецензирани од колеги, но сугерираат дека третманот е безбеден.

„Ова е многу позитивен исход. Ова е многу возбудливо“, изјавил Џејмс Сент Џон, невролог од Универзитетот Грифин во Австралија за „Нејчр“.

Претходните испитувања на други видови матични клетки, исто така, покажаа дека терапијата е безбедна, но имаа мешани резултати.

„Ништо досега навистина не функционираше успешно“, рекол Сент Џон.

Потребни се поголеми клинички испитувања за да се утврди дали подобрувањата кај двете лица во најновата студија биле навистина резултат на третманот. Можно е, додаде, ова да е природно закрепнување.

Во текот на 2019 година, околу 900.000 луѓе на планетата имаа повреда на ‘рбетниот мозок, а околу 20 милиони луѓе живеат со последиците од овие повреди.

Репрограмираните или индуцираните плурипотентни матични клетки (iPS) се создаваат со враќање на возрасните клетки во ембрионска состојба, од каде што можат да се развијат во други типови на клетки. Во ова клиничко испитување, клетките беа добиени од донатори за да се произведат нервни претходник-клетки. Два милиони од овие клетки биле инјектирани во местото на повредата на пациентот, со надеж дека повремено ќе се развијат во неврони и глијални клетки.

Првата операција е направена во декември 2021 година, а другите три меѓу 2022 и 2023 година. Сите 4 пациенти биле возрасни мажи, а двајца биле постари од 60 години. Сите имале операции помеѓу две и четири недели по повредата. Тие користеле лекови за потиснување на имунитетот околу 6 месеци за да спречат телото автоматски да ги напаѓа новите клетки по операцијата.

По една година, истражувачите не забележале никакви сериозни ефекти. Сите пациенти го започнаа клиничкото испитување со класификација на повреди од А, што значи дека немаа сензорна или моторна функција под местото на повредата. Двајца учесници не покажаа подобрување. Едно лице е преместено во класификација Ц, што значи дека може да движи некои мускули на рацете и нозете, но не може да стои самостојно. Еден од пациентите постигнал класификација Д и сега може сам да стои.

„Оваа личност сега вежба одење. Тоа е драматично закрепнување. Прелиминарните анализи покажуваат дека третманот е успешен“, изјавил Окано.

Сепак, предупредува Сент Џон, потребна е поголема студија за да се докаже ефективноста на третманот.

„Понекогаш луѓето со повреди на ‘рбетниот мозок едноставно закрепнуваат природно“, додал тој.