Револуционерната терапија, првично наменета за лекување на напреднат рак на дојката, покажува исклучителни резултати и во раните фази на болеста, значително подобрувајќи ги изгледите за подолг живот на пациентките, пишува „Саенс алерт“ (Science Alert).

Според фармацевтската компанија „Лили онколоџи“, клиничкото испитување од третата фаза потврди дека таблетата абемациклиб (abemaciclib), попозната под трговското име верзенио (verzenio), може значително да го намали ризикот од враќање на болеста кај одредени видови ран рак на дојка што се проширил на лимфните јазли.

Потврда на стандардите во лекувањето

Иако резултатите од седумгодишното следење сè уште не ја поминале стручната рецензија, компанијата објави дека наскоро ќе ги сподели податоците на медицинскиот состанок и ќе ги предаде на објавување во научното списание.

„Овие податоци го потврдуваат верзинио како стандард на грижа за пациенти со болест со позитивни лимфни јазли и висок ризик и ја зголемуваат итноста за обезбедување лекување на сите квалифицирани пациенкти“, изјавил Џејкоб Ван Нарден, претседател на „Лили онколоџи“.

Одобрување и механизам на дејствување

Откако беше одобрен од страна на Администрацијата за храна и лекови на САД (ФДА) во 2017 година, верзенио се покажа како делотворна терапија за рак на дојка и најчесто се користи во комбинација со хормонската терапија. Само минатата година, лекот ѝ донесе на компанијата 5,3 милијарди долари приходи.

Верзенио првично беше одобрен за напреден или метастатски рак на дојка кој е хормонски рецепторски позитивен (HR+). Овој вид рак, кој сочинува помеѓу 70 и 80 отсто од сите случаи, се карактеризира со туморски клетки со рецептори кои реагираат на хормони и го поттикнуваат растот. Во 2023 година, ФДА ја прошири употребата на лекот и на раните фази на ракот со висок ризик од враќање, а најновите податоци покажуваат дека одлуката била правилна.

Лекот делува така што во комбинација со хормонската терапија го спречува размножувањето на клетките на ракот. Додека ендокрината терапија го блокира ефектот на хормоните врз рецепторите, верзенио ги инхибира ензимите кои се клучни за клеточната делба.

Резултати што ја менуваат практиката

Студијата вклучила 5.637 возрасни лица со најчест тип на рак на дојка: HER2-негативен и HR+ во рана фаза. Се покажало дека по две години комбинирана терапија со верзенио и хормонската терапија, вкупното преживување на пациентките било значително подобрено во споредба со само хормонската терапија.

Иако овој тип на рак е високо излечив, пациентките во испитувањето имале болест која веќе се проширила на лимфните јазли, што го зголемило нивниот ризик од рецидив.

„Спречувањето на рецидивот на болеста и помагањето на пациентките да живеат подолго е крајната цел и висока скала во адјувантното лекување. Постигнувањето статистички значајна корист за вкупно преживување со само две години терапија со верзенио го зајакнува неговиот диференциран профил кај HR+, HER2- раниот рак на дојка со висок ризик“, рекол Ван Нарден.