Кинеската комунистичка партија ги разреши своите највисоки функционери за покраината Хубеи и нејзиниот главен град Вухан, епицентарот на епидемијата на Ковид-19, објави денеска кинеската официјална новинска агенција Синхуа.

Во извештајот се наведува дека функцијата генерален секретар на Комитетот на партијата за Хубеи ја презел градоначалникот на Шангај Јинг Јонг, додека на тоа место во Вухан ќе дојде Ванг Жонглин.

Овие се нови во низата отпуштања на високи функционери, откако претходно неделава беа сменети двајца функционери на локалната здравствена комисија.

Државните медиуми во Кина наведуваат дека поради грешки при постапување во епидемијата на новиот вирус, се очекува голем број функционери да бидат исклучени од Комунистичката партија по бројните критики на јавноста на сметка на локалните власти.