Овој викенд Охрид ќе биде домаќин на завршниот турнир на Купот на Македонија во ракомет. Титулата ја брани Алкалоид, кој ќе го отвори полуфиналето со дуел против Вардар 1961. Во второто полуфинале Еурофарм Пелистер ќе се сретне со домаќинот Охрид.

Тренерот на Еурофарм Пелистер, Раул Алонсо, го најави претстојниот натпревар против ГРК Охрид. Битолскиот суперлигаш силно посакува после долго време да го врати Куп-трофејот во својот град, а со тоа се сложува и Алонсо, кој рече дека неговиот тим точно ја знае својата мисија.

– Ќе биде прекрасен викенд и веќе се подготвуваме за натпреварот против Охрид. Ќе имаме одлична атмосфера, а ние се фокусираме на освојување на трофејот. Сакаме да го вратиме во Битола после многу години. Сите екипи ќе бидат крајно мотивирани и мислам дека ќе решаваат мали детали. На ваквите турнири секогаш се можни изненадувања. Во моментов мислиме само на првиот меч, а со помошта на нашите навивачи, се надевам дека ќе се пласираме во финалето – вели Алонсо.

Дуелот на Охрид и Еурофарм Пелистер ќе се игра в сабота од 19.30 часот, а ќе го судат Ѓорѓи Начевски и Славе Николов.

– Купот се два натпревари, турнирски систем и е поразлично и специфично. Се подготвуваме за полуфиналето, а двата победници имаат малку време за финалето. Моментална инспирација и индивидуален квалитет знаат да ги решаваат ваквите натпревари. Секако дека двата дена ќе бидат тешки, прво треба да се подготвиме само за мечот во сабота и да го добиеме првиот меч, а потоа ќе размислуваме за финалето. Прво да го победиме Охрид, па ќе се насочиме кон следниот предизвик – се зборовите на голманот на РК Еурофарм Пелистер, Никола Митревски.