Работењето на нафтоводот „Дружба“ вратен во нормала
Полскиот оператор на нафтоводот ПЕРН (PERN) денеска соопшти дека е обновено пумпањето сурова нафта во оштетениот нафтовод „Дружба”.
„Денеска техничките служби на ПЕРН ја вратија целосната функционалност на оштетениот нафтовод што се користи за испорака на сурова нафта до германските клиенти”, се наведува во соопштението на ПЕРН, пренесено од Радио Слободна Европа.
Протекувањето беше откриено на 11 октомври, а ПЕРН следниот ден соопшти дека нема знаци дека штетата е предизвикана од саботажа на трета страна.
„Се истражуваат причините кои довеле до истекувањето. Во моментов активноста на службите на ПЕРН е насочена кон расчистување на просторот и негово враќање во првобитната состојба”, се наведува во соопштението.
Нафтоводот „Дружба” е најдолгиот цевковод во Европа и светот, долг повеќе од 4.000 километри. Неговиот почеток е во Татарстан, во Русија, а крајот е во Германија.