Македонската одбојкарска сениорска репрезентација во својот трет натпревар на Европското првенство го претрпе првиот пораз во рамките од групата „Ц“.

Во СЦ „Борис Трајковски“ – Скопје нашите најдобри одбојкари загубија од Полска со 0:3 во сетови 25:12, 25:21 и 25:14.

Полјаците, освојувачи на Светската лига на нации, докажаа зошто се фаворити не само во нашата група, туку се и едни од главните кандидати за освојување на златниот медал на ова ЕП.

Избраниците на селекторот Јошко Миленкоски беа свесни за големиот предизвик, дадоа добар отпор особено во вториот сет кога имавме 21:21, но противникот во клучните моменти врза четири поени во серија и го освои сетот за 2:0.

Наш најефикасен беше Н. Ѓоргиев со 12 поени, а на спротивната страна 17 поени имаше Беднорж.

По три одиграни кола на табелата во групата „Ц“ води Полска (9:1) со девет бодови, пред Холандија (7:3) и Македонија (6:4) со по шест, по три имаат Чешка (3:7) и Црна Гора (3:7), а последна е Данска (3:9) без бодови.

Фокусот е на следните два меча во кои ќе се обидеме да се избориме за второто или третото место со цел да се избегне Италија во осминафиналето кое теоретски не е и натаму обезбедено.

Следниот дуел Македонија ќе го има против Холанѓаните во вторник од 17.00 часот, а в среда од 20.00 часот ривал е селекцијата на Чешка.