Сликата „Мадона и детето“ на италијанскиот уметник Антонио Солари, создадена во 16 век, е украдена пред повеќе од половина век од музеј во северна Италија, е пронајдена во Велика Британија кај жена во Норфолк која одбива да ја врати иако делото е заведено на полициските списоци на украдени уметнички дела.

Сликата е купена од приватна колекција во 1872 година од Градскиот музеј во италијанскиот град Белуно, каде што била изложена до 1973 година, кога била украдена заедно со неколку други изложени уметнички дела, пишува „Гардијан“.

Некои од сликите украдени во 1973 година од музејот во Белуно набрзо беа пронајдени во Австрија, но „Мадона и детето“ дојде во сопственост на Барбара де Дожа, која тврди дека нејзиниот покоен сопруг, Барон де Дожа, добронамерно ја купил оваа слика на Солари во 1973 година.

 

View this post on Instagram

 

A post shared by Art Recovery International (@artrecovery)

Во 2017 година, Барбара де Дожа се обидела да ја продаде сликата преку регионална аукциска куќа, но „Мадона и детето“ биле забележани од некој поврзан со музејот во Белуно, од каде стигнала потврда дека делото е на списоците на украдена уметност на Интерпол и италијанската полиција.

Поради пандемијата „ковид-19“ и меѓународните блокади, италијанските власти не беа во можност да ги обезбедат релевантните документи што ги побара британската полиција, па затоа сликата беше вратена на Барбара де Дожа во 2020 година.

Кристофер Маринело, специјалист по уметничко право, неколку пати се обидел да ја убеди г-ѓа Де Дожа да ја врати сликата на нејзините вистински сопственици, но таа се повикала на Статутот за ограничувања од 1980 година, кој вели дека лицето кое купува украдени предмети може да биде препознаено како законски сопственик ако купувањето не било „поврзано со кражбата“ повеќе од шест години.

„Ова само го покажува неуспехот на надлежните британски служби да им помогнат на Италијанците. Британската полиција тврди дека оваа жена не извршила кривично дело и дека оваа работа не ја третира како кривично, туку како граѓански случај“, рекол Маринело во изјава за „Гардијан“.