Промоцијата на книгата „Крсте Петков Мисирков – македонскиот меѓник“ – прво и второ изменето и дополнето издание, на Свето Стаменов, еден од најплодните македонски публицисти, политиколог и новинар на Македонското радио – Радио Скопје, автор и коавтор на педесетина книги од областа на меѓународната политика, европските и евроатлантските интеграции, одбраната и безбедноста, меѓуцивилизацискиот и меѓуконфесионалниот дијалог, литературата и од областа македонистиката со посебен акцент врз македонскиот стандарден јазик, се одржа на 9 февруари во амфитеатарот на Институтот за македонски јазик „Крсте Мисирков“ во Скопје.

Настанот се одржа во чест на 70-годишнината од формирањето на Институтот „Крсте Мисирков“ и на 120-годишнината од објавувањето на македонската „златна“ книга „За македонцките работи“ на Крсте Петков Мисирков, книга која претставува „македонска национална програма“, која е актуелна и денес, 120 години по нејзиното објавување.

Присутните на промоцијата во улога на домаќин ги поздрави проф. д-р Елена Јованова-Грујовска, директорка на Институтот за македонски јазик „Крсте Мисирков“, која го потенцираше значењето на објавата на книгата, но и значењето на патронот на установата со која раководи. Инаку, првото издание на „Крсте Петков Мисирков – македонскиот меѓник“, беше објавено во 2020 година по повод 90-годишнината од смртта на Крсте Петков Мисирков и 115–годишнината од објавувањето на „За македонцките работи“, додека второто изменето и дополнето издание, кое беше објавено пред само три месеци, е посветено на 95-годишнината од смртта на Крсте Петков Мисирков, според многумина, најзначајниот Македонец на XX век.

Крсте Петков Мисирков е основоположник и прв кодификатор на македонскиот литературен јазик и правопис и на автохтоноста на македонската национална свест, револуционер и бескомпромисен борец против туѓите пропаганди и за македонска национална афирмација.

Второто изменето и дополнето издание на „Крсте Петков Мисирков – македонскиот меѓник“, кое содржи 20 радиоинтервјуа, е поделено на три дела: интервјуа посветени на 90-годишнината од смртта на Крсте Петков Мисирков, реализирани во периодот од 26 јули 2016 до 21 февруари 2017 година; интервјуа посветени на 115-годишнината од објавувањето на „За македонцките работи“, реализирани во периодот од 15 октомври до 19 ноември 2018 година и интервјуа посветени на 95-годишнината од смртта на Крсте Петков Мисирков, реализирани во периодот од 28 мај до 16 септември 2021 година на програмите на Македонското радио – Радио Скопје.

Промотори на изданието беа проф. д-р Васил Тоциновски, проф. д-р Лидија Тантуровска, научен советник во Институтот за македонски јазик „Крсте Мисирков“, професор Људмил Спасов, претседател на Советот за македонски јазик при Владата на РСМ, и проф. д-р Димитар Пандев.

Со објавата на книгата авторот Стаменов прави обид што поавтентично да се задржи изговореното во етерот во книжевен формат, а притоа да не се наруши волшепството на радиото. И ова второ изменето и дополнето издание на „Крсте Петков Мисирков – македонскиот меѓник“ на Свето Стаменов несомнено е јасен и недвосмилен македонски одговор на најновата антимакедонска кампања што во последниве две-три години континуирано ја спроведуваат бугарските официјални власти и некои бугарски академски кругови со која се негираат посебноста на македонската нација, нејзиниот национален идентитет, нејзината историја и, особено, македонскиот стандарден јазик. Книгата на Стаменов е значаен прилог во одбрана на идентитетот и јазикот на македонскиот народ.

(Текстот е објавен во „Културен печат“ број 166, во печатеното издание на весникот „Слободен печат“ на 11-12 февруари 2023)