Данскиот гигант „Ново нордиск“, познат како производител на лекот „вегови“ за намалување на телесната тежина, стана највредната компанија во Европа.

Со пазарна вредност од 428 милијарди долари „Ново нордиск“ го симна од европскиот трон францускиот конгломерат „ЛВМХ“.

Лекот „вегови“, кој создава чувство на ситост и го намалува апетитот кај луѓето, стана глобално популарен откако милијардерот Илон Маск и холивудски ѕвезди објавија дека им помага да ја регулираат телесната тежина, иако експерти предупредија дека ефектите се само привремени и дека дозите „векови“ не може да ги заменат класичните методи – вежбање и здрава исхрана. Сепак, интересот за лекот е поголем од производствените капацитети на данскиот гигант, поради што се доставува ограничено количество дози.

Според податоци на Организацијата за соработка и развој (ОЕЦД), речиси една третина од жителите на Обединетото Кралство имаат прекумерна тежина, што ги прави Британците најдебели во Европа.

Нови испитувања во август покажале дека „вегови“ придонесува и за намалување на ризикот од мозочен и срцев удар. Резултатите сѐ уште не се темелно проверени, но првите впечатоци на експертите се дека испитувањата се „потенцијално значајни“.