Зимските месеци се периоди од годината кога повеќето луѓе се чувствуваат осамено, тврдат експертите. Тоа не е само проблем на менталното туку и на физичкото здравје.

Како што објаснуваат експертите, тоа воопшто не е изненадувачки, бидејќи во текот на глобалната пандемија на коронавирусот бевме буквално исклучени од општеството и затворени меѓу четири ѕида.

Осаменоста е најприсутна кај помладите – и тоа кај оние во дваесеттите години од животот.

Не само што осаменоста е проблем со менталното здравје, според новата студија објавена во списанието „Стареење“ (Aging), истражувачите од Универзитетот Стенфорд и Универзитетот во Хонг Конг открија дека таа може да влијае и врз нас физички. Всушност, поради осаменоста побрзо старееме.

„Откривме дека психолошките фактори како што се чувството на осаменост додаваат до 1,65 години на биолошката возраст, што има ист ефект врз нашето здравје како пушењето 15 цигари на ден“, објаснуваат тие во истражувањето.

Ова го забележала и д-р Мег Арол, психолог.

„Дефинитивно забележав зголемување на осаменоста, чувството на изолација и лошото расположение во мојата пракса во последните неколку години. Сега сме во вториот бран на тешкотии со менталното здравје по пандемијата. Луѓето често имаат таканаречена емоционална затапеност, што е симптом на депресија“, објаснува Арол.

Таа додала дека напредокот на технологијата и постоењето на социјалните мрежи е нешто што е добро, но има и свои недостатоци.

„Живееме во виртуелно-глобален свет, а од многу истражувања знаеме колку е важна физичката интеракција и за физичкото и за менталното здравје“, вели таа.