Приведен возачот на камионот што пропадна во фонтаната, Град Скопје тврди дека немал дозвола за движење на плоштадот
Возачот на камионот, што утрово пропадна во подната фонтана на плоштадот Македонија, е приведен и изведен пред суд. Од Град Скопје тврдат дека возилото на приватната компанија чиј камион неовластено влегол на плоштадот Македонија, по што причинил материјална штета немало дозвола за движење на плоштадот, иако имало поднесено такво барање.
Возачот, странец, државјанин на Турција е приведен и изведен пред суд. За овој настан МВР ќе поднесе и соодветен поднесок. Град Скопје по извршениот инспекциски увид издаде санкција која правното лице ќе треба да ја плати во рок од 10 дена, во спортивно ќе следи прекршочна и кривична пријава – информираат од Град Скопје.
Подната фонтана на плоштадот Македонија не работи неколку лета, токму поради честите оштетувања и од возила на градската чистота и од превозници кои пропаѓаат во неа, а кои претходно добиле специјални дозволи за движење низ плоштадот заради завршување на некои работи.