Новата подваријанта БA.4.6 на варијантата омикрон на коронавирусот се шири со забрзано темпо во САД веќе некое време, а сега е потврдена и во Велика Британија. Според најновите бројки, британската Агенција за безбедност на здравјето вели дека во текот на неделата што почнала на 14 август, новата подваријанта сочинувала 3,3 отсто од сите позитивни тестови во Велика Британија. За само еден месец се проширила за дури 9 отсто, според податоците на Центарот за контрола и превенција од болести (ЦДЦ), пишува „Сајенс алерт“.

Оваа варијанта е исто така идентификувана и во неколку други земји низ светот и претставува „потомок“ на варијантата БA.4 на омикрон. Иако не е сосема јасно како се појавила варијантата БA.4.6, најверојатно станува збор за рекомбинантна варијанта, истакнуваат експертите. Ова се случува кога две различни варијанти на вирусот истовремено заразуваат едно лице.

Новата подваријанта е слична на варијантата БA.4, но сепак ја носи мутацијата која му овозможува на вирусот да навлезе во човечките клетки. Таа мутација, Р346Т, е забележана во некои други варијанти и е се поврзува со избегнување на имунолошкиот одговор, што значи дека на вирусите со таа мутација им е полесно да ги избегнат антителата настанати со вакцинацијата или со претходната зараза.

Засега не постојат извештаи кои укажуваат на сериозни симптоми на оваа подваријанта, но секако е позаразна од претходните. Според информациите на британската Агенција за безбедност на здравјето, врз основа на раните проценки, се претпоставува дека со БА4.6 побрзо се заразува во однос на варијантата БA.5.

Појавата на подваријантата БA.4.6, како и другите подваријанти на коронавирусот, ги загрижува експертите. Тоа покажува дека вирусот е сè уште присутен кај населението, како и дека мутира за да пронајде нови начини да го избегне нашиот имунолошки одговор создаден со вакцинацијата и претходната зараза.