Принцот Хари (39) го загуби судскиот спор против одлуката на британската влада да му се одземе заштитата финансирана од даночните обврзници на Велика Британија, откако тој се откажа од кралските должности, пишува Си-ен-ен.

Британското министерство за внатрешни работи одлучи во февруари 2020 година дека на Хари повеќе нема да му се дава „исто ниво“ на заштита како другите активни членови на кралското семејство кога тој ќе престојува во земјата.

По оваа одлука војводата од Сасекс покрена правна постапка. Од адвокатите на Хари беше наведено дека одлуката е напад врз него. За време на сослушувањето во декември, адвокатите тврдеа дека одлуката значи дека тој бил „издвоен“ и третиран „понеповолно“. Сега судот пресуди дека одлуката е оправдана и „не постои процедурална неправедност“.

Принцот и неговата сопруга Меган живеат во Калифорнија од јули 2020 година. Војводата од Сасекс често и гласно зборуваше за безбедноста на своето семејство, споредувајќи го третманот на неговата сопруга со третманот на неговата мајка Дијана.

Правниот спор беше еден од неколкуте тужби поднесени од принцот Хари во Велика Британија. Тој неодамна ја повлече тужбата за клевета поднесена против весникот „Мејл он сандеј“ поради напис за неговата лична заштита. Војводата од Сасекс ја повлекол тужбата неколку часа пред неговите адвокати да ги предадат соодветните документи.

Весникот, исто така, објави дека Хари сега ќе мора да ги плати сите трошоци за весникот, кои изнесуваат околу 250.000 фунти, како и сите други трошоци, кои се проценува дека се вкупно 500.000 фунти.

Лекувањето на кралот Чарлс: „Ќе се користат помалку инвазивни методи“