Театарот „Војдан Чернодрински“ ја најави премиерата на претставата „Чиста куќа“ од Сара Рул во режија на Тамара Стојаноска, која ќе биде изведена на 31 мај, во 20 часот, на сцената на НУЦК „Марко Цепенков“ во Прилеп.

Преводот на текстот е на режисерката, а драматург е Лидија Митоска-Ѓорѓиевска. Сценографијата, дизајнот на плакатот и рекламниот материјал ги подготви Филип Коруновски, музички соработник е Ана Митоска, а изборот на костими го направи Тамара Стојаноска во консултација со актерската екипа.

Во претставата играат Даниела Иваноска, Наташа Ачански, Катерина Чакмакоска-Клинческа, Јасмина Мицовска Станкоска и Димитар Ѓорѓиевски.

– Претставата „Чиста куќа“ по текстот на Сара Рул раскажува длабока човечка приказна за животот и смртта, преку пет различни, но меѓусебно испреплетени ликови. Зборуваме за непредвидливите пресврти во животот и начинот на кој се соочуваме со нив, за болката што е неизбежна, за големината на простувањето, но и за љубовта и губењето на истата. Претставата го истражува ширењето на емпатија и начинот на кој се справуваме со траумите од детството – во нашиот случај, преку вицови, како средство за преживување, бегство и поврзување…

Чистењето во оваа претстава не е само физичка активност, тоа е метафора. Додека домовите ни блескаат, внатре во нас често владее неред, несредени емоции, потиснати чувства, нерешени болки и осаменост. Куќата може да биде уредна и тивка, додека душата е немирна, полна со тишина што вришти. Чистењето овде станува чин на грижа, на бегство, на обид за враќање контрола, но и чин на љубов, особено кога се прави за некој друг…

„Чиста куќа“ не е само приказна за чистење простор, туку за чистење на внатрешниот емотивен хаос. Авторката нè потсетува дека не сме совршени, но и дека токму во таа несовршеност се крие нашата човечност – образложува режисерката Тамара Стојаноска.

(Текстот е објавен во „Културен печат“ број 283, во печатеното издание на весникот „Слободен печат“ на 31.05.-01.06.2025)