Инспирирана од животни искуства и со колективно авторство „Секс, лаги и главоболки“ е динамична, духовита и емотивна претстава што со леснотија се движи на тенката линија помеѓу хуморот и драмата, но секогаш останува искрена и блиска до животот.

Преку четири различни приказни што ќе ја разголат комплексноста на љубовните односи – од комични недоразбирања до болни откритија – четворица актери мајсторски толкуваат повеќе ликови, поставени во парадоксални ситуации на нивните љубовни односи, брачни предизвици и неверства.

– Претставата нуди смеа, препознавање и моменти за размислување, оставајќи го гледачот со чувство дека бил дел од еден жив, вистински и емотивен свет – истакнува режисерката Александра Кардалевска.

Драматург на претставата е Благица Секулоска, сценографијата, костимите и визуелниот дизајн се на Онур Озџан, а дизајнот на светло е на Душан Кардалевски. Музички соработник со аранжмани и продукција е Оливер Јосифовски во соработка со аудиопродукцијата на Давор Јордановски, а на виолина свири Михајло Михајловски.

Во претставата играат Жаклина Петровска, Елена Кузманов, Тони Денковски и Сергеј Димоски, а употребен е и глас на Жаклина Стевковска Дрнасин.

На изработката на сценографијата работеа Никола Николовски и Војдан Запров, инспициент е Александар Јорданов, за реквизитите се погрижи Жаклина Петковска, гардеробери се Љупчо Атанасоски, Елизабета Стојчева и Каролина Билјароска, светло мајстор е Слободан Илиоски, тон маjстор е Томи Анчов, суфлер е Зорица Манаскова, а проект менаџер е Ирина Ацеска. Премиерната изведба на претставата е на 22 мај, во 20 часот, во Театар Комедија.