Најдобрите македонски ракометари ќе бидат парично наградени доколку обезбедат пласман на Европското првенство кое ќе се организира од 15 јануари до 1 февруари 2026 година во Данска, Норвешка и Шведска.

Ракометната федерација на Македонија (РФМ) одреди парична награда од 1.500.000 денари доколку избраниците на селекторот Кирил Лазаров се пласираат на следното ЕП.

– Ве известуваме дека Управниот Одбор на Ракометната Федерација на Македонија, согласно Член 35, 59 и 60 од Статутот поради итност на донесување на одлукa согласно Член 3 точка 11 “Одлука без присуство” од Законот за здружение и фондации (Сл. весник на РМ бр. 52 од 16.04.2010 год.) на ден 06.05.2025 година донесе одлука за доделување на парична награда.

Управниот Одбор на РФМ одреди парична награда за македонската сениорска машка ракометна репрезентација, за успешен пласман на претстојното европско првенство преку квалификациски натпревари против репрезентациите на Естонија и Литванија во рамки на квалификациите за ЕП 2026 во висина од 1.500.000,00 денари нето износ од РФМ.

Како дополнитена мотивација од Министерстото за спорт по одлука на Министерот за спорт Борко Ристовски вети дополнителна парична награда од 1.500.000,00 денари нето износ, за нашата машка сениорска репрезентација за пласман на Европското првенство – стои во објавата на РФМ.

В четврток (8 мај) Македонија ќе игра во Талин против Естонија, а три дена подоцна во Скопје ќе ја пречека Литванија.