Вредните домаќинки веќе наголемо почнаа да подготвуваат зимница, а на вашите полици задолжително додајте и домашен кечап направен од домати и густин. Поисплатливо е да го направите сами, а е многу поздраво отколку купечкиот.

Кечапот можете да го користите како прилог со многу јадења, а најмногу се служи со помфрит и пица.

Состојки:

– 8 кг домати
– 2 лажици оцет
– 300 грама шеќер
– 120 грама сол
– 200 грама густин
– оригано (по избор)
– 1 ќесичка конзерванс

Подготовка:

Доматите исечкајте ги, па кратко бланширајте ги во зовриена вода. Кога ќе се изладат, излупете ја лушпата и добро испасирајте. Можете да ги пасирате во блендер, а можете и во машинка за мелење, доколку имате.

Смесата сипете ја во тенџере и откако ќе зоврие, варете уште половина час. Потоа сипете оцет, шеќер и сол. Добро измешајте, за сите состојки убаво да се соединат. Смесата оставете го на шпорет уште 10 минути, а потоа одвојте литар од смесата и додајте го густинот.

Потоа смесата со густинот сипете ја во доматите и убаво измешајте за сѐ да се соедини. Оставете да се вари уште половина час, па на крајот додадете оригано и конзерванс. Измешајте го приготвениот кечап, па сипете го во стерилизирани тегли.