Познато е името на главниот судија кој ќе дели правда во финалето на Светското првенство во Катар во кое се среќаваат Аргентина и Франција.

Мечот за светската титула ќе се игра в недела од 16.00 часот, а судиска правда ќе дели Шимон Марцињак од Полска.

Марцињак на Мундијалот судеше на два натпревари, интересно, по еден на Аргентина и актуелниот светски шампион Франција.

Прво ја делеше правдата на мечот Франција – Данска, кој „галските петли“ го добија со 2:1 во групната фаза, а со истиот резултат „гаучосите“ во осминафиналето ја елиминираа Австралија.

ФИФА генерално избегнуваше во натпреварите кога играат два тима од различни континенти да има арбитер кој доаѓа од еден од тие континенти, па ќе видиме дали евентуално тоа ќе послужи како причина Аргентинците да се жалат, доколку не го остварат посакуваниот резултат што го очекуваат во финалето.