Десет противпожарни камиони го гасат пожарот во депонијата „Дрисла“ кој избувна попладнево. Како што информираше Звонко Томевски, командант на Територијалната противпожарна бригада на Град Скопје, била побарана помош и од ЈП „Комунална хигиена“ од каде се испратени две цистерни за дотур на вода, кои се на локацијата и ги дополнуваат противпожарните возила.

-Така што, се надевам дека за брзо време пожарот ќе биде целосно изгаснат, изјави Томевски.

Бил побаран и авион на Дирекцијата за заштита и спасување за помош при гасењето, но, за жал, рече тој, немало услови да интервенира.

-Станува збор за посериозен пожар од поголеми размери, имаше опасност да се зафати околната борова шума која е во близина на депонијата и да се предизвика дополнително шумски пожар којшто можеше да загрози понатаму и објекти кои се во близина, додаде командантот на Територијалната противпожарна бригада на Град Скопје.