Сојузот на синдикатите на Македонија (ССМ) бара да се повлече и да се доработи Предлог-законот за системот на платии во јавниот сектор, за да се пресретнат негативните ефекти кои ќе ги предизвика. ССМ бара тоа да се направи во консултации со претставниците на работниците синдикатите и експерти од Меѓународната организација на труд и останати чинители преку инклузивен процес.

Од ССМ повторија дека во ниту еден момент не бил вклучени и информирани за подготовката на овој закон, кој, како што наведуваат, „Владата преку МИОА во очи на Нова година на ЕНЕР го поставила Нацрт-законот за системот (кратење) на плати во јавниот сектор”.

-Според првичниот увид во текстот сметаме дека се намалуваат правата на работниците во делот за платите и се елиминира можноста за уредување на оваа материја со колективните договори со што значително ќе се влијае на укинување на колективните договори во јавен сектор во кои се уредени системот на плати и нивната исплата, а за што ССМ изнинатиот период предупредуваше. Во Нацрт- законот е уредено дека исплатата на дополнителната компонента на платата и надоместоците на плата зависи од тоа дели се предвидени средства во буџетот и на тој начин индиректно ќе се врши намалување на платите на вработените во дејностите каде што се исплаќа истата во овој момент – реагираат од ССМ.

Од ССМ наведуваат дека дополнително вредноста на бодот за ниво на работно место ја утврдува Собранието на предлог на Владата. Според нив, во процесот повторно се исклучени синдикатите и нивните претставници со што се елиминира нивната улога.

-Она што загрижува е дека платите дополнително ќе се намалуваат доколку работникот користи годишен одмор, што е уставно загарантирано право и за време на користење на годишен одмор вработените имаат право на плата во висина на нивната основна плата, а за време на привремена неспособност за работа надомест на плата во висина од 80 отсто од основната плата. Се ова укажува дека во Нацрт- законот е предвидена максимална надлежност на државните органи во регулирањето на оваа материја без социјален дијалог со што се крши Конвенцијата за правата на работниците во јавниот сектор, како и другите меѓународни документи и принципи и правото на колективно договарање на вработените во јавниот сектор, се вели во соопштението.