Редок портрет на индискиот лидер и борец за независност Махатма Ганди, насликан со маслени бои, е продаден на аукција во Лондон за повеќе од 200.000 долари, пренесува „Н1“.

Портретот е насликан од британската уметница Клер Лејтон во 1931 година, кога Ганди го посети Лондон за да присуствува на втората Конференција на тркалезна маса за уставните реформи за Индија и нејзините барања за самоуправа.

Според информациите од аукциската куќа „Бонхамс“, Лејтон била меѓу ретките уметници кои имале можност да седат со Ганди и да го сликаат, бидејќи била примена во неговата канцеларија и го скицирала неколку пати.

Уметничкото дело било во личната колекција на Лејтон до нејзината смрт во 1989 година. Аукциската куќа не открила кој ја купил сликата, ниту дали ќе биде изложена за јавноста.