Поразителен е фактот што на крајот на 2023 година зборуваме за 8.000 работници кои зеле плата од 1 денар до 20.175 денари (минималец), реагираше претседателот на ССМ, Слободан Трендафилов. Според него, уште една голема направда за работниците е што дури 25.000 од нив живеат само од минималната плата. Оваа состојба е резултат на дупка во Законот за плати која произлегува од можноста придонесите на платите да се платат до 15 во месецот за претходниот месец, а платата за претходниот месец да може да се исплати до 25 во тековниот месец.

-Ова го користат работодавачите како можност воопшто да не исплатат плата, односно да го исплатат долгот кон државата на придонеси на минимална плата и да не исплатат плата на вработените. Во овој случај доколку платата што треба да се исплати е повисока од минималната, губи и државата бидејќи се платени придонеси на пониска плата. Состојбата се провлекува со години, но државата не е заинтересирана да го реши проблемот бидејќи приходот од придонесите државата го собира и не ја интересира дали работникот ќе земе плата – брифираат синдикалците, кои бараат УЈП да ги следи и износите на прикажаните нето-плати и да има казни за фирмите кои не се придржуваат кон обврската да им исплатат плати на вработените.

Министерката за труд и социјала Јована Тренчевска, се согласува дека ова е голем проблем, кој треба да се реши. Од неа и ветувањето дека сите трудови инспектори излегуваат на терен и постапуваат по секоја пријава од работниците.

-Како министерка се залагам да се отстранат ваквите непеправди и ги ќе се бориме со сите сили да ја исправиме – истакна Тренчевска на конференцијата во ССМ, на која беше претставена новата методологија за пресметка на синдикалната кошничка.