Помпеја ќе го ограничи бројот на посетители на 20.000 дневно и ќе воведе персонализирани билети од следната недела во обид да се справи со прекумерниот туризам и да го заштити местото на светско наследство, рекоа официјалните лица, пренесува „Гардијан“.

Ова лето рекордни 4 милиони луѓе ги посетија остатоците од античкиот римски град, кој беше затрупан под пепел и карпи по ерупцијата на Везув во 79 година.

Директорот на археолошкиот парк, Габриел Зутригел, рече дека посетителите на главниот локалитет сега надминуваат просечни 15.000-20.000 секој ден, а новата дневна граница ќе спречи понатамошно зголемување на бројките.

„Покрај ограничувањето на бројот на посетители, од следната недела ќе се воведат и персонализирани билети за да се запре прекумерниот број на туристички посети и да се овозможи подобра заштита на ова светско културно наследство“, најавија надлежните од археолошкиот локалитет.

„Работиме на низа проекти за намалување на притисокот на туристите на археолошкиот локалитет.

„Премногу посетители може да претставуваат ризик и за посетителите и за археолошкото историско наследство, кое е уникатно и кревко“, рече директорот на Археолошкиот парк Помпеја, Габриел Зутригел.