Откако пред неколку месеци граѓани алармирале дека до горната пешачка патека на кејот на реката Вардар , позади хотел „Русија постои провалија длабока десетина метри,  покрај дупката е поставена ограда. Директорот на Центарот за управување со кризи, Стојанче Ангелов  на денешната прес-конференција, посочи дека ЦУК ги известил Општина Аеродром и Град Скопје за постоењето на ваквата опасност и побарале да биде решен проблемот.

Неколку месеци подоцна по запазување на неопходната процедура од страна на Градот Скопје и Општината Аеродром оградата е поставена. Со поставување на оваа ограда долга околу 200 метри, се гарантира безбедноста на граѓаните, особено во ноќните часови кога осветленоста е многу слаба – рече Ангелов.

Тој ги повика сите граѓани доколку забележат опасност која го загрозува нивниот живот или нивните материјални добра, да се јават на бројот 112 и да ја пријават таа опасност.

Во однос на опасната карпа на Матка, Ангелов објасни дека се следи од Градежниот факултет, наместени се сензори и состојбата е стабилна, а браната „Липа“ во општина Неготино е испразнета и не претставува опасност за граѓаните. Поправена е и големата дупка на мостот кон Драчево, додека на мостот кон Визбегово е направена ограда, но според Ангелов, тој сѐ уште не е обезбеден како што треба.
Ангелов информира и дека ЦУК одржал седум координативни средби со надлежните институции и здруженија на граѓани за надминување на проблемот со бездомни кучиња.