Денеска три македонски екипи ќе ги имаат првите натпревари од првото квалификациско коло во Лигата на конференции, од 17.30 часот Македонија Ѓорче Петров ќе го пречека РФС од Летонија на ФФМ Тренинг Центарот во Скопје.

Ѓорчепетровци предводени од тренерот Горан Симов ќе се обидат да извлечат поволен резултат пред реваншот кој ќе се игра на 20 јули.

Во Каунас, Литванија, составот на Шкупи од 19.00 часот ќе ги одмери силите против Хегелман. Чаирчани се соочија со проблем пред мечот поради проблемот со вадењето виза за еден од своите клучни играчи, Валид Хамиди и нема да може да настапи во првите 90 минути.

Тренерот на Шкупи, Чихан Арслан ветува дека неговите фудбалери ќе го дадат максимумот на теренот.

– Валид не е со нас овде, жал ни е поради тоа. Но, играчите кои ќе ги избереме ќе го покријат местото на Валид, додека ние ќе излеземе на терен да победиме – вели Арслан.

Последниот трет наш претставник во ова натпреварување, Шкендија на Националната Арена „Тодор Проески“ – Скопје од 20.00 часот за противник ќе го има Хаверфордвест од Велс.

Стратегот на тетовските „црвено-црни“, Ардијан Нухиу верува во своите фудбалери дека можат да покажат добри перформанси против Велшаните.

– Мора да имаме правилен пристап, очекувам многу добра игра од нашиот тим. Атмосферата е многу добра, тоа е можност за играчите да покажат колку вредат. Со поддршка од навивачите мислам дека можеме да дојдеме до победата – се зборовите на Нухиу.

Потсетување дека ова лето нашата земја на меѓународната фудбалска сцена ја претставува и шампионот Струга Трим Лум кој на првиот меч од првото квалификациско коло во ЛШ ремизираше во Литванија против Жалгирис.