По воведувањето на еврото во Хрватска ќе работат помалку менувачници
Државниот секретар на Министерството за финансии изјави дека по 1 јануари и воведувањето на еврото ќе продолжат да работат помал број менувачници од сегашните 1.100.
„Може да се претпостави дека помал број субјекти ќе бидат заинтересирани за девизно работење“, рече Здравко Зринушиќ, презентирајќи ги измените на Законот за девизно работење пред хрватскиот Сабор.
Девизниот бизнис, рече тој, ќе го продолжат субјектите на кои тоа им е дополнителна дејност, покрај редовните, како фирми кои поседуваат хотели и слично. Околу 1.100 овластени менувачи остваруваат вкупен годишен обрт од околу 30 милијарди куни, а размената на куни во евра сочинува 93,8 отсто од нивниот промет. Претпоставката е дека менувачниците нема да бидат заинтересирани да продолжат да работат за да се менуваат други валути, информира Хина.
Зринушиќ потсети дека менувачниците работат преку ИТ програми лиценцирани од Хрватската народна банка (ХНБ) и дека од стапувањето во сила на законот ќе имаат рок од три месеци да се прилагодат и да преминат од куната на еврото. Доколку не го сторат тоа, ќе се смета дека не се заинтересирани и таквите лиценци ќе им бидат одземени, рече тој.