Хрватската Влада денеска ги објави мерките со кои ќе и се помогне на државата да задржи поголем број од работните места во компаниите.

Мерките ги претстави хрватскиот премиер Андреј Пленковиќ а со нив се предвидува работа со скратено време, самовработување и помагање на микро – претприемачите во борбата против последиците од пандемијата.

Мерката скратено работно време, како што појасни Пленковиќ, можат да ја користат работодавачите со повеќе од 10 работници со планиран пад од најмалку 20 проценти во однос на истиот месец минатата година, со докази за отежнато работење.

– Мерките се однесуваат на периодот до декември оваа година, рече Пленковиќ.

Тој додаде дека финансиската поддршка ќе изнесува 2.000 куни нето (265 евра) по работник.

Пленковиќ појасни дека работодавачот е должен да плати придонеси за финансиска поддршка и дека договорот за вработување не може да се раскине најмалку 30 дена по завршувањето на користењето на поддршката.