Филмската продуцентка Ангела Несторовска од „Сектор филм“ е избрана да биде дел од овогодишното 25-то издание на #ProducersOnTheMove, кое ќе се одржи пред и за време на Филмскиот фестивал во Кан (14 – 25 мај 2024 година).

Дваесет од најперспективните европски продуценти се избрани да учествуваат во престижната платформа за промоција и вмрежување на „European Film Promotion“, која оваа година слави бројни соработки со повеќе од 500 учесници од 37 европски земји.

Продуцентката Ангела Несторовска станува дел од „Сектор филм“ во 2005 година и има продуцирано повеќе филмови, како „Почва“ на Алекс Цветков, „Насоки“ на режисерот Стефан Командарев, кој беше селектиран на „Un Certain Regard“ на Канскиот филмски фестивал во 2017 година, копродуцент е на „Виа Карпатија“ на Клара Кочанска и Каспер Бажон и се натпреваруваа на Интернационалниот филмски фестивал во Карлови Вари во 2018 година.

Неодамна беше копродуцент на дебитантскиот долгометражен филм „Зад стоговите сено“ на грчката режисерка Асимина Проедроу, а во моментов е во постпродукциска фаза на „Момчето со светло-сини очи“ на Танасис Неофотистос.

Покрај тоа, Ангела Несторовска е во претпродукција на „Потстанар“ во режија на Марко Ѓоковиќ, а во развој е на филмскиот проект „A Bear for Comrade Kim“ на Ангел Апостолски.