Севернокорејската армија денеска соопшти дека неодамнешната воена вежба на Јужна Кореја и САД е „отворена провокација” и затоа одговори со мерки што симулираат напади врз нивните воздушни бази и воени авиони, објави државниот медиум КЦНА.

Северна Кореја во текот на целата измината недела тестираше повеќе проектили, вклучувајќи го и неуспешниот интерконтинентален балистички проектил (ИЦБМ) и стотици артилериски гранати истрелани во морето, во моменти кога Јужна Кореја и САД спроведуваа шестдневна воздушна вежба, што траеше до саботата.

Воената вежба „Будна бура” (Vigilant Storm) беше „отворена провокација со цел намерно да се зголемат тензиите и беше од многу агресивна природа” кон Северна Кореја, се наведува во соопштението на Главниот штаб на Корејската национална армија, во изјава што ја пренесе официјален претставник на агенција КЦНА.