Петмина мажи се осудени на по 12 години затвор во Нигерија, откако биле осудени за ексхумација на човечки череп. Тие планирале да го однесат кај „традиционален лекар“ кој им рекол дека черепот е потребен за ритуали кои ќе ги збогатат.

Мажите се изјасниле за виновни откако биле фатени со черепот во торба. Обвинителот изјавил пред судот дека мажите ископале тело закопано три години претходно на муслиманските гробишта во северноцентралната афиканска држава Нигер, пренесува Би-Би-Си.

„Тие рекоа дека лекарот ги информирал и им ветил на сите дека ќе го поделат богатството од споменатата криминална активност и ги упатил да го бараат човечкиот череп“, рече обвинителот, цитиран од весникот „Дејли Панч“.

Службениците за безбедност ги уапсиле младите мажи, кои биле на возраст меѓу 18 и 28 години, на почетокот на септември додека ги пренесувале посмртните останки на трето лице, по инструкции на лажниот лекар.

Судот во Мина, главниот град на државата Нигер, ги прогласил мажите за виновни по обвиненијата за криминален заговор, незаконско поседување на човечки череп. Традиционалниот лекар не бил уапсен и не е обвинет.

Верувањето во „џуџу“ – понекогаш познато како вуду или магија – е прилично распространето во Нигерија, при што многумина го комбинираат или со христијанството или со исламот, според извештајот од 2010 година на Истражувачкиот центар Пју. Ваквите верувања, особено дека деловите од човечкото тело можат да произведат пари од глинен сад, доведоа до неодамнешен бран на грозоморни убиства во Нигерија, кои често се насочени кон поединци кои се сметаат за ранливи, вклучувајќи деца, самохрани жени и лица со посебни потреби.

Локалните власти, исто така, рекоа дека делови од телото се продаваат и се користат во ритуали за кои се верува дека создаваат богатство. Ритуалите за правење пари во Нигерија, исто така, се поттикнати од зголемениот економски очај, во земја каде четири од 10 луѓе живеат во сиромаштија, според податоците на Светска банка.