Бугарија нема да прави ништо под притисок во врска со Северна Македонија, изјави денеска бугарскиот премиер Кирил Петков, коментирајќи го развојот на односите меѓу Скопје и Софија, јави БГНЕС.

– Ништо нема да правиме под притисок, изјави Петков при посетата на местото Садово, кое беше погодено од град.

Петков истакнал дека Бугарија се обидува да види дали нејзините барања и потреби за поддршка на Бугарите во Македонија можат да бидат гарантирани преку европскиот процес.

– Ќе оставам на Министерството на надворешни работи, затоа што тие преговараат токму сега. Прашање е дали преку европскиот процес може да се гарантира бугарската позиција, а не некој да не притиска за било што, додаде Петков.

Францускиот претседател Емануел Макрон, синоќа имал телефонски разговор со бугарскиот претеседател Румен Радев и со македонскиот премиер Димитар Ковачевски, соопштија од Елисејската Палата.

Макрон е подготвен да ги пречека во Париз Ковачевски и Радев „кога ќе дојде време“ со цел да се склучи билатерален договор што ќе овозможи отворање на преговорите за пристапување на Македонија во ЕУ.

„Франција, која претседава со ЕУ до 1 јули, веќе неколку недели ја поддржува потрагата по решение за спорот меѓу двете земји. За време на разговорите, Макрон ја изрази својата целосна поддршка за договор меѓу двете земји, како и почитување на основните права на граѓаните кои изјавуваат дека припаѓаат на други заедници или на малцинства“, информираа од Елисејската палата.