Стела Морис, партнерката на Џулијан Асанж, го повика американскиот претседател Џо Бајден да ја промени одлуката на администрацијата на претходниот претседател Доналд Трамп и да го повлече обвинението против основачот на Викиликс за шпионажа, пренесува Ивнинг Стандард.

Асанж се наоѓа во затворот во Белмарш, сместен на југоисточниот дел на Лондон и тој води судска борба против САД кои се жалеа на одлуката на локалниот суд кој го одби барањето за екстридиција на Австралијанецот.

Воведното рочиште ќе се одржи денеска во Високиот суд.

„Потполно е јасно дека американската администрација треба да ја смени одлуката. Бајден не може истовремено да ја брани слободата на медиумите и да ја води оваа постапка“ вчера изјави Стела Морис пред затворот во Белмарш.

Асанж е приведен откако Еквадор одби да му го продолжи азилот во својата лондонска амбасада, а тој е обвинет за 17 случаи со шпионажа. Доколку тој е предаден на САД и е прогласен за виновен, може да добие затворска казна од 175 години.