Поранешниот македонски репрезентативец и европски шампион со Црвена звезда, Дарко Панчев дојде до идеја да се организира хуманитарен, пријателски фудбалски натпревар меѓу српската и македонската репрезентација, а потоа да следи и гостување на Црвена звезда во Скопје.

Сето тоа со цел да им се помогне на семејствата на настраданите во пожарот во дискотеката „Пулс“ во Кочани.

– Да помогнеме колку што можеме, за сите добри, прекрасни души, за децата. Последниот ден од викендот се слушнав со Пикси Стојковиќ, која има безброј фанови во Скопје и низ Македонија, и предложив да се организира натпревар меѓу репрезентациите. Веднаш ме поддржа, а идејата наиде на едногласна согласност од раководните структури на Фудбалскиот сојуз на Србија.

Ви благодарам. Срцето ми се кине, ова е нешто каде што целиот регион мора да се обедини, за сите да покажеме дека сме луѓе, а сме, луѓе сме! Неизмерна почит за гестот, за подадената рака, милион пати: благодарам. Во чест на оние кои… Тешко ми е, ве молам разберете што прекинувам – се зборовите на Панчев.

Во својата мака, Панчев го контактираше и Звездан Терзиќ, генералниот директор на Црвена звезда, притоа споменувајќи го и хуманитарниот карактер на средбата, гостувањето на поранешниот европски и светски шампион во Скопје.

– Останува само да се одреди датум, Црвена звезда за сѐ ќе се договори со Вардар, директорот Терзиќ го спомна 16 април, благодарам, што друго да кажам. Во име на Кочани, Скопје и цела Македонија, ви благодариме за грижата, за тоа што се прави за повредените, за нивниот транспорт и лекување во Србија, благодарам на братскиот народ – кажа Панчев за „Спорт Клуб“.

Стојковиќ: Незапамтена трагедија во Кочани, ќе предложам да се игра натпревар за поддршка и со хуманитарен карактер