Во отворено писмо до премиерот Христијан Мицкоски и до министерот за култура Зоран Љутков, вработените во Македонската филхармонија апелираат да не се повторува „погубната практика на кадровски грешки при назначувањето нов директор на установата“.

– Ви го пишуваме ова писмо од име на вработените во Македонската филхармонија со надеж дека ќе го имате предвид значењето на нашата институција, при носењето на финална одлука за назначување на нејзин нов директор на конкурсот кој се уште е во тек. Би сакале однапред да укажеме, за да нe се повтори погубната практика на кадровски грешки кои беа составен дел од водењето политика во минатото – се вели во писмото.

Како што велат тие, уште во јуни, пред формирањето на новата Влада, во еден медиум, Изет Меџити јавно објави дека Коалицијата Вреди ја „добила“ Филхармонија и дека Мустафа Имери ќе биде првиот Албанец, кој ќе раководи со институцијата.

– Оваа скандалозна објава ја руши легитимноста на конкурсот кој сè уште е во тек, бидејќи името на г-дин Имери сè уште фигурира низ кулоарите како сигурна и договорена опција за директорското место на нашата институција – велат вработените.

Тие сметаат дека директор на Филхармонија легитимно се избира на конкурс, и треба да се избере кандидатот со најдобра програма и професионални квалификации и референци.

– Македонска филхармонија е единствен државен симфониски оркестар во земјата, кој осум децении освен што ја промовира класичната музика на највисоко ниво е главен промотор и на македонската музичка мисла и на домашните композитори и изведувачи од нејзиното основање до денес. Оркестарот во изминатите осумдесет децении имаше подеми и падови, се соочуваше со многубројни проблеми, пред сè, со недостаток на сопствен концертен простор. Со изградбата на новата концертна сала, музичарите од Македонската филхармонија ги добија сите неопходни услови за работа, а Македонија може да се пофали дека е единствена земја во регионот, чиј државен симфониски оркестар има свој дом. Сонот на нашите претходници, на низа генерации музичари конечно стана реалност, нивниот сон го живееме ние денеска, одржувајќи ја во живот богатата македонска музичка традиција. Онаа која композиторот Тодор Скаловски во далечната 1944 година, визионерски ја преточи во камен-темелник на македонската музичка култура – се додава во писмото.

Вработените во писмото порачуваат дека другите земји во светот имаат по неколку државни симфониски оркестри, Македонија има само еден – тоа е Македонската филхармонија.

-Таа е национален симбол, таа е столб на македонската култура, наш најголем амбасадор во светот. Токму поради тоа, за нас е исклучително важно кој ќе застане на чело на нашата институција, бидејќи тоа ја одредува насоката во која ќе продолжиме да се движиме во иднина. Мисијата на нашите основоположници и претходници за нас е светост, таа е аманет, кој, ние вработените го чуваме како најскапоцен дар, и ќе продолжиме да се бориме за да го зачуваме, бидејќи Македонската филхармонија не е само единствен симфониски оркестар во државата, туку и верен чувар на нашиот национален идентитет – порачаа вработените во Македонската филхармонија.