Научниците открија нов начин на кој луѓето можат да го почувствуваат допирот – директно преку фоликулите на косата. Досега се сметаше дека само нервните завршетоци во кожата и околу фоликулите на косата можат да пренесат сензација, но се чини дека тоа не е точно и дека можеме да го почувствуваме допирот и со коренот на косата, пишува „Саенс алерт“.

Научниците од Универзитетот на Империал колеџ во Лондон откриле дека клетките во делот од фоликулот на косата наречен надворешна коренска обвивка (ОРС) имаат поголем процент на рецептори кои се чувствителни на допир отколку еквивалентни клетки во кожата.

Тие потоа произвеле лабораториски култури на клетки на фоликулите на човечкото влакно со сензорни нерви. Кога тие механички ги стимулирале клетките на фоликулите на косата, се активирале и околните сетилни нерви.

Покрај тоа, експериментите покажале дека клетките на (ОРС)  ги ослободуваат невротрансмитерите серотонин и хистамин преку ситни кесички (везикули) и на тој начин испраќаат сигнали до околните клетки.

„Ова е многу возбудливо откритие бидејќи покренува нови прашања. Зошто овие клетки играат таква улога? Што друго можеме да научиме од нив за начинот на кој нашата кожа го чувствува допирот? изјави невроинженерот Парасто Хашеми од Империал колеџ во Лондон.

Механорецепторите се нервни клетки кои регистрираат допир; поради нив можеме да почувствуваме лесен ветер или цврсто ракување. А клетките на фоликулите на косата се чини дека имаат посебна интеракција со механорецепторите со низок праг, кои можат да регистрираат нежни допири.

Иако веќе беше познато дека влакната на телото играат важна улога во чувството за допир, истражувачите открија подетална биолошка интеракција меѓу клетките што оди подалеку од едноставниот механички одговор. Единственото преостанато прашање е – зошто сето ова?

„Сè уште не знаеме зошто клетките на фоликулите на косата имаат улога во обработката на лесен допир. Бидејќи фоликулот содржи многу сензорни нервни завршетоци, сега сакаме да утврдиме дали фоликулот на косата активира одредени видови на сензорни нерви како дел од досега непознатиот, но уникатен механизам“, вели биоинженерот Клер Хигинс од Империал колеџ во Лондон.

Истражувањето со наслов „Механичката стимулација на културите на надворешната обвивка на коренот на фоликулите на човечката коса ги активира соседните сензорни неврони“ беше објавено во списанието „Саенд адвансес“.