Во несреќата со жичницата „Глорија“ во Лисабон, при која загинаа 16 лица, вклучително и туристи од Велика Британија, причината била кинење на кабелот што ги поврзувал кабините, стои во првиот официјален извештај на Канцеларијата за спречување и истрага на воздушни и железнички несреќи, пренесе „Скај њуз“.

Според извештајот, несреќата започнала само шест метри по поаѓањето, кога кабината „ја изгубила балансирачката сила на кабелот“.

ВИДЕО: Жичарницата „Глорија“ во Лисабон излета од шините – најмалку 15 мртви, повеќе од 20 повредени

Дежурниот кочничар веднаш ја активирал пневматската и рачната кочница, но мерките не успеале да ја намалат брзината. Кабината продолжила да забрзува, излетала од шините со околу 60 километри на час и удрила во зграда, сето тоа за помалку од 50 секунди.

Истрагата засега покажува дека опремата била редовно одржувана, а токму утрото пред несреќата бил извршен закажан визуелен преглед. Сепак, точката каде што се скинал кабелот не била видлива без расклопување.

Жичницата „Глорија“, национален споменик и една од најпознатите атракции на Лисабон, го поврзува плоштадот Рестаурадорес со областа Баиро Алто. Несреќата се случила во средата околу 18 часот, кога горната кабина се лизнала надолу и излетала од шините на само 30 метри од подножјето.

Меѓу жртвите се британските државјани Кејли Смит (36) и Вилијам Нелсон (44), уште едно лице од Велика Британија, како и петмина Португалци, од кои четворица биле добротворни работници.