Во вторник со почеток од 18.00 часот во Ереван, Ерменија, фудбалерите на актуелниот македонски шампион Струга Трим Лум ќе го одиграат реванш натпреварот од второто квалификациско коло во Конференциската лига против Пјуник.

Потсетување дека на првиот меч одигран во Охрид играчите предводени од тренерот Ќатип Османи триумфираа со 2:1.

Подобриот од овој двомеч во третото квалификациско коло ќе игра со подобриот од пресметката Ордабаси (Казахстан) – Диферданж (Луксембург). Диферданж по првите 90 минути има водство од 1:0.

– И покрај водството што го имаме, мора многу сериозно да влеземе во утрешниот натпревар, давајќи го максимумот од себе, за конечно да дојдеме до целта – вака вели тренерот Османи на прес-конференцијата пред ерменските новинари.

Османи во вторник ќе го запише својот 30 натпревар како тренер во европските клупски натпреварувања.

– Има две екипи кои се борат за пласман во следната рунда, но сепак чувствата треба да бидат што е можно помирни и мирни пред да влеземе во натпреварот. И покрај тоа што имаме мало водство, истиот не е резултат кој ни гарантира пласман во следната рунда, па секако деновиве работевме и разговаравме, за да го дадеме максимумот за пласман во третото коло.

Секако дека го анализиравме противникот и бев импресиониран бидејќи е тактички многу дисциплиниран тим, со поединци кои знаат да бираат ситуации во вистински моменти, па секако утре очекуваме тежок натпревар каде што веројатно ќе одлучуваат нијанси или детали – се зборовите на Османи.