Со наслов „Младите доаѓаат и звукот на идната генерација“ на 5 јуни, во 20 часот, ќе се одржи традиционалниот концерт на оркестарот на Македонската филхармонија со учениците и студентите од државните музички училишта и факултети.

Диригент е маестро Борјан Цанев, а на програмата се дела од А. Марчело, Е. Бара. Ф.А. Хофмастер, К.М. Вебер, Ф. Лехар, К. Дитерсдорф, Г. Хуе, Х. Виењавски, Д. Мијо, В.А. Моцарт, Ф. Менделсон, Сен-Санс, В. Зубицки и Д. Шостакович.

Како солисти ќе настапат: Стефан Трајановски – саксофон, Бојан Крстевски – кларинет, Ангела Влинтовска – виола, Боjан Наумовски – кларинет, Деница Дена Стоjаноска – соло пеење, Огнен Златанов – контрабас, Магдалена Ковилоска – флејта, Божана Гошева – виолина, Бојан Анакијевски – удирачки инструменти, Давид Петрушев – кларинет, Ѓорѓи Димовски и Григори Ангелов – саксофон, Боjана Митковска – виолина, Филип Петрески – хармоника и Милица Станковиќ – пиjано.

Со настапите дома и во странство, а особено со последните гостувања со Краковската, Северночешката, Софиската и Македонската филхармонија, Борјан Цанев останува еден од најбараните диригенти во Македонија и во поширокиот регион.

Маестро Цанев ја балансира својата кариера помеѓу сценските настапи и наставата како професор на Факултетот за музичка уметност во Скопје. Неговиот 20-годишен ангажман како главен диригент на Македонската филхармонија одигра исклучително важна улога во квалитативниот раст на ансамблот. Во улогата на наставник и ментор, тој поведе многу генерации музичари кон нивните професионални патишта дома и во светот.

Како добитник на високите признанија „Виртуози – најдобар музички изведувач“ и „Ѓорѓи Божиков“ – за најдобра изведба на дела од македонски композитори, тој важи за еден од најпрефинетите музички уметници во Македонија.