За претстојниот велигденски викенд, охридските хотелиери ќе ги пречекаат гостите со услуги поскапени за над 30 отсто, пренесува телевизијата „24“.

Хотелиерите го правдаат поскапувањето со високите цени на производите, енергенсите, а најмногу на повисоките плати за персоналот кои газдите мора да ги обезбедат за да ги задржат работниците.

„И покрај поскапувањето на хотелските услуги, земјава останува најевтина дестинација во регионот. Покрај сите поскапувања кои ги имаме, на Балканот сме уште една од поевтините дестинации. Нема повеќе 20 и нешто евра за ноќевање, туку е 30 и нешто евра, а некаде и повеќе“, вели Крсте Блажески, претседател на ХОТАМ.

Охридските туристички работници, и покрај инфлацијата и економската криза, очекуваат успешна сезона и голем број туристи. Хотелиерите велат дека има „поволна клима на туристичкиот пазар“.

„Уште стоиме со Холанѓаните. Се очекуваат пет, а се споменуваат до осум – девет летови неделно. Турските гости, полските гости, ТУИ Англија се внесува, имаме повеќе Англичани годинава…“, додава Блажески.

Замрзнувањето на цените на прехрамбените производи според нив нема да ги намали цените бидејќи трошоците се зголемени како резултат на енергетската криза.