Следното лето Охрид и Струга ќе се соочат со недостиг од сместувачки капацитети, предупредуваат од туристичкиот сектор. Поради ваквата состојба, групи туристи кои одат на одмор во Албанија доаѓаат во Охрид само за преспивање. Ова значи дека ако праксата продолжи ни следните години, Охрид и Струга ќе нема каде да ги сместат гостите.

„Во моментов во Албанија се градат многу хотели и објекти и туризмот цвета. Секојдневно сме сведоци на десетици автобуси кои пристигнуваат на ден. Главно тие се на пропатување кон Албанија. Ние за жал немаме доволно капацитет. За следната сезона можно е да се соочиме со недостиг на сместувачки капацитети“, изјави Јаким Маленко, сопственик на туристичка агенција во Охрид.

Хотелиерите се надеваат дека државата и УНЕСКО ќе најдат начин и компромис да овозможат понатамошен развој на туризмот во Охрид, почитувајќи ги културните, природните и економските интереси. Тие бараат од ХОТАМ да одобри детални урбанистички планови за сите 65 километри од езерскиот брег.

„Има детален урбанистички план за помалку од 10 проценти и како да го правиме развојот? Што овозможува ова? Овозможува градби без дозвола“, изјави Крсте Блажески – претседател на ХОТАМ.

Хотелиерите се жалат дека поради немањето вакви урбанистички планови пропаѓа можноста да аплицираат за пари од европските фондови за инвестирање во туристички капацитети.